Pse avokati Yll Zeka pretendon se KPM po tenton të frikësojë mediat?
Sipas avokatit Yll Zeka, vendimet e fundit të Komisionit të Pavarur për Media nuk do ta kalojnë filtrin ligjor dhe gjyqësor.
PRISHTINË — Vendimet e fundit të Komisionit të Pavarur për Media (KPM) nuk synojnë zbatimin e tyre praktik, por kanë për qëllim kryesor frikësimin e mediave në Kosovë. Kështu ka deklaruar avokati Yll Zeka në emisionin 'Tempus' në T7, duke ngritur dyshime serioze mbi ligjshmërinë e këtyre akteve.
Zeka u shpreh i bindur se vetë anëtarët e KPM-së janë koshientë për problemet e mëdha ligjore që i shoqërojnë këto masa. Sipas tij, ata e dinë se këto vendime "nuk e kalojnë filtrin ligjor" dhe se efekti i tyre lidhet më shumë me ndikimin te mediat sesa me zbatimin real.
Në këtë situatë, avokati u ka bërë thirrje të gjitha mediave të prekura që të mos heshtin dhe të përdorin çdo mjet të mundshëm ligjor. Secili medium që ka pranuar vendime të tilla duhet t'i ankimojë ato pa vonesë për të mbrojtur lirinë e shprehjes dhe funksionimin e pavarur.
Në fund, avokati shprehu bindjen e tij të plotë se këto vendime kontestuese nuk do ta kalojnë dot kontrollin përfundimtar gjyqësor. Sipas tij, ato do të rrëzohen sapo të ballafaqohen me filtrin e gjykatës, nëse nuk rregullohen më parë nga Komisioni i Ankesave brenda KPM-së.
Burim: Demokracia
— Redaksia ZHURMA