Waterhouse thotë se ende nuk është martuar me Pattinson

Këngëtarja Suki Waterhouse ka sqaruar se ceremonia e dasmës me aktorin Robert Pattinson nuk ka ndodhur ende, duke pasur parasysh zërat e vazhdueshëm për një kurorëzim të mundshëm në fshehtësi pas tetë vitesh bashkë. Ajo ka treguar se dasma nuk është në planet e tyre të afërta pasi angazhimet e shumta profesionale u kanë pamundësuar gjetjen e momentit të duhur.

Këngëtarja dhe aktori nisën lidhjen e tyre në vitin 2018 dhe u fejuan në vitin 2023. Çifti u bë me fëmijë për herë të parë në mars të vitit 2024, kur erdhi në jetë vajza e tyre, emrin e së cilës kanë zgjedhur ta mbajnë larg vëmendjes së publikut.

Në një intervistë për mediumin The Sunday Times, këngëtarja ka sqaruar se bashkë me partnerin e saj kanë jetuar mes Londrës, Nju Jorkut dhe Los Anxhelosit që nga lindja e vajzës në mars të vitit 2024. Ajo ka treguar se dinamika e punës së tyre e ka bërë të vështirë organizimin e jetës familjare në një vend të vetëm, duke bërë që të ndërrojnë shtëpi me qira çdo disa muaj.

Sipas sqarimeve të saj, çifti dëshiron që organizimi i dasmës të jetë mjaft i madh kurdo që të bëhet. Ajo ka thënë se se nuk do të kënaqeshin me një ceremoni të thjeshtë ose modeste, por kërkojnë një organizim të plotë kur kushtet ta lejojnë.

«Do të ishte ose gjithçka, ose asgjë. Nëse do ta bënim, do të organizonim një festë gjigante», ka thënë Waterhouse gjatë intervistës. Ajo ka shtuar gjithashtu për periudhën pas ardhjes në jetë të vajzës: «Që kur kemi vajzën, jeta jonë ka qenë paksa e pazakontë. Kemi jetuar në shtëpi me qira dhe jemi zhvendosur çdo disa muaj. Thjesht nuk kemi pasur një vend që ta quajmë shtëpi».