Thomas Markle Sr transferohet në një qendër për kujdesin e demencës

Thomas Markle Sr., babai i dukeshës së Sussex-it Meghan Markle, është transferuar të premten në një strukturë të specializuar për kujdesin e kujtesës dhe personave me demencë në Florida, sipas raportimeve nga gazeta «The Sun» dhe mediat britanike, ndërsa 82-vjeçari po hetohet për materiale të dyshuara të abuzimit seksual me fëmijë.

Siç raportoi Zhurma më 26 tetor 2026, dukesha e Sussex-it i kishte dërguar një letër të atit ku i ndalonte takimin me fëmijët pas akuzave të rënda me të cilat po përballej ai.

Sipas gazetës «The Sun», 82-vjeçari qëndronte prej muajit maj në një qendër rehabilitimi pasi i ishte amputuar këmba e majtë. Lëvizja e tij në këtë strukturë mund t'i ndërlikojë hetimet e FBI-së, ka paralajmëruar avokati amerikan Spencer Kuvin, i cili përfaqëson viktimat e financierit të dënuar për krime seksuale Jeffrey Epstein. Dyshimet ndaj tij u ngritën pasi djali i tij, Thomas Markle Jr., deklaroi në polici se kishte gjetur materiale me abuzim seksual me fëmijë mes sendeve personale të të atit në Filipine, ku kishin jetuar së bashku.

Nga ana tjetër, FBI ka konfirmuar nisjen e hetimit pasi u zbuluan materiale të dyshuara në një njësi magazinimi që ai kishte marrë me qira në Rosarito të Meksikës, ku policia ka sekuestruar pajisjet e gjetura. Thomas Markle i ka hedhur poshtë akuzat, duke i cilësuar ato si «gënjeshtra të neveritshme», si dhe deklaroi për mediat se nuk posedonte asnjë njësi magazinimi në Rosarito.

Autoritetet në Filipine kanë paralajmëruar se posedimi i materialeve të paligjshme mund të dënohet me deri në 12 vite burg nëse ai shpallet fajtor. Ndërkohë, po hetohet edhe mënyra se si u trajtua një letër me akuza për abuzim seksual e shkruar nga Roslyn Loveless, ish-bashkëshortja e tij e parë, e cila i u dorëzua Meghan Markle në vitin 2019 nga një efektiv i njësisë së mbrojtjes mbretërore të Policisë Metropolitane, ku ky i fundit e kishte këshilluar dukeshën të mos fliste publikisht për këto akuza.