Vetëvendosje shkon në 51 ulëse, AAK-ja humb një mandat

PRISHTINË — Lëvizja Vetëvendosje ka arritur të sigurojë 51 ulëse në Kuvendin e Kosovës, pas numërimit të rreth 20 për qind të votave që kanë ardhur me postë nga diaspora. Vetëm në këtë pjesë të votave të numëruara deri më tani, kjo parti ka marrë më shumë se 69 për qind të mbështetjes.

Kjo është ulësja e tretë që i shtohet Vetëvendosjes nga diaspora, duke marrë parasysh se në votimin preliminar brenda Kosovës ajo kishte siguruar 48 mandate. Dy ulëset e para të fituara nga ky proces ia zvogëluan mandatet Partisë Demokratike të Kosovës në 23 dhe Lidhjes Demokratike në 19.

Nga ky numërim i fundit e ka pësuar Aleanca, e cila ka rënë në 7 mandate nga 8 sa kishte sipas projeksioneve të mëhershme. Nëse vazhdon ky trend i votave të mbetura, Vetëvendosje mund të marrë edhe një ulëse tjetër. Aktualisht, VV-ja udhëheq me 44.6 për qind në nivel kombëtar.

Deri më tani, Komisioni Qendror i Zgjedhjeve ka tërhequr rreth 85 mijë zarfe me vota nga diaspora, prej të cilave janë procesuar të dhënat e rreth 11 mijë votave. Ndërkohë, PDK-ja radhitet e dyta me 20.5 për qind, LDK-ja e treta me 17.26 për qind, kurse AAK-ja qëndron nën 7 për qind.

Për formimin e qeverisë dhe zgjedhjen e kryeparlamentarit mjaftojnë 61 vota, të cilat Vetëvendosje herën e kaluar i siguroi me pakicat. Megjithatë, për zgjedhjen e presidentit kërkohet pjesëmarrja e të paktën 80 deputetëve në votim, një çështje kjo që e çoi vendin në zgjedhjet e jashtëzakonshme të 7 qershorit.

Burim: Koha.net
— Redaksia ZHURMA