VV: LDK-ja gati për një president konsensual, PDK-ja insiston vetëm për të vetin
Konjufca tha se më shumë vullnet politik sjell më shumë opsione për të gjetur zgjidhje.
PRISHTINË — Lëvizja Vetëvendosje sheh gatishmëri te Lidhja Demokratike e Kosovës për të bashkëpunuar në zgjedhjen e presidentit të ri, pavarësisht problemeve të brendshme të kësaj partie. Qëndrimi i LDK-së ndryshon nga ai i Partisë Demokratike, e cila insiston se presidenti duhet të vijë nga radhët e saj. Kjo vjen dhjetë ditë para seancës konstituive të Kuvendit të Kosovës, ku partitë politike ende nuk kanë nisur takimet formale për formimin e institucioneve.
Glauk Konjufca, nënkryetari i Vetëvendosjes dhe ministër në detyrë i Punëve të Jashtme, tha të hënën: "Lidhja Demokratike e Kosovës ka dhënë mendimin e saj se mund të ketë një bashkëpunim sa i përket zgjedhjes të një presidenti i cili do të ishte përfaqësues për të gjithë."
Për Partinë Demokratike, tha Konjufca, nuk ka pasur shumë hapësirë për diskutim, pasi krerët e saj mendojnë të gjithë njësoj se presidenti duhet të jetë i PDK-së. Konjufca e bëri këtë krahasim në konferencën për media të hënën, të mbajtur bashkë me ministrin francez të Jashtëm, Benjamin Haddad.
Konjufca shtoi se, ndryshe nga herët e kaluara, ka vullnet në mesin e partive opozitare për të mos shkuar në zgjedhje të reja. "Ka një gatishmëri më të lartë për bashkëpunim nga LDK-ja, e unë mendoj që opsionet që dalin në tavolinë për arritjen e një marrëveshjeje janë në përpjesëtim me vullnetin," tha ai.
Në të njëjtën ditë, Kosova dhe Franca nënshkruan pesë marrëveshje, përfshirë marrëveshjen administrative për mësimdhënien e gjuhës frënge në shkollat e Kosovës, marrëveshjen për ndihmë juridike të ndërsjellë në çështje penale, marrëveshjen për ekstradim dhe marrëveshjen e kredisë me Agjencinë Franceze për Zhvillim për Lojërat Mesdhetare 2030.
Ministri francez i Jashtëm, Benjamin Haddad, tha se ajo që po dëshmohej ishte "thellimi i marrëdhënieve ndërmjet dy vendeve tona dhe hapja e rrugës për lidhje edhe më të ngushta në të gjitha fushat", përmes mbështetjes së Agjencisë Franceze për Zhvillim dhe zgjerimit të mësimit të gjuhës frënge në shkolla.
Burim: Top Channel
— Redaksia ZHURMA