Kurti pret ministrin francez, marrëveshjet e nënshkruara forcojnë marrëdhëniet me Francën
Marrëveshja për ekstradim dhe ndihmë të ndërsjellë juridike forcojnë bashkëpunimin ndërmjet institucioneve
PRISHTINË — Kryeministri në detyrë i Kosovës, Albin Kurti, e priti në takim ministrin e Deleguar për Evropën të Republikës Franceze, Benjamin Haddad. Duke përmendur se sot janë nënshkruar pesë marrëveshje mes Kosovës dhe Francës, ai tha se ato thellojnë bashkëpunimin dypalësh në disa fusha kyçe.
Sipas Kurtit, marrëveshja për ekstradim dhe marrëveshja për ndihmë të ndërsjellë juridike forcojnë bashkëpunimin ndërmjet institucioneve tona të drejtësisë, në luftimin e krimit dhe sigurimin e llogaridhënies.
Marrëveshja e kredisë prej 60 milionë eurosh dhe themelimi i Komitetit Francë–Kosovë do të mbështesin investimet infrastrukturore, përgatitjen dhe organizimin e Lojërave Mesdhetare Prishtina 2030, si dhe trashëgiminë e tyre afatgjatë.
Kurti tha se me ministrin Haddad diskutuan “për integrimin evropian të Kosovës, sigurinë rajonale, bashkëpunimin ekonomik dhe thellimin e partneritetit dypalësh”.
“E falënderova Ministrin Haddad për vizitën dhe për angazhimin e tij në avancimin e marrëdhënieve ndërmjet të dyja vendeve. Marrëveshjet e nënshkruara sot dëshmojnë se partneriteti ynë po shndërrohet gjithnjë e më shumë në projekte, investime dhe rezultate konkrete për qytetarët e Kosovës”, shkroi ai.
Burim: Koha.net, https://www.koha.net/arberi/kurti-marreveshjet-e-nenshkruara-forcojne-marredheniet-me-francen
— Redaksia ZHURMA