Sa ulëse do të marrë VV-ja dhe kush humb mandatin e 53-të?

PRISHTINË — Eugen Cakolli nga KDI-ja ka vlerësuar se numërimi i votave me postë do të ndryshojë shpërndarjen e mandateve. Sipas trendeve aktuale, Lëvizja Vetëvendosje pritet të kalojë në 53 mandate, duke u rritur nga rezultati fillestar.

"Me shumë gjasë ky do të jetë numri përfundimtar i ulëseve për këtë subjekt politik", ka shkruar Cakolli në Facebook. Ai theksoi se ndryshimi është pothuajse i sigurt pasi kanë mbetur edhe disa dhjetëra kuti të votave me postë.

Gara për mandatin e 53-të mbetet e hapur dhe tepër e ngushtë mes PDK-së dhe LDK-së. Cakolli parashikon që fillimisht LDK-ja mund të humbë mandatin e 19-të, por në fund PDK-ja të jetë ajo që e lëshon mandatin e 22-të.

Dallimi në koeficientë mes dy partive mund të përkthehet në më pak se 100 vota. Kjo e bën situatën të paqartë deri në përfundim të plotë të numërimit. Votat me kusht, që zakonisht ndjekin trendin e votimit brenda Kosovës, mund ta favorizojnë lehtë PDK-në.

AAK pritet të qëndrojë e palëvizur me 7 ulëse. Numërimi i votave me postë do të përmbyllet më së largu nesër paraditë, ndërsa votat me kusht deri nesër në mesnatë.

Në varësi të përqindjes së vendvotimeve që KQZ-ja mund të vendosë të rinumërojë (deri në 10%), i tërë procesi do të duhej të mbyllet në fund të kësaj jave. Deri atëherë, shpërndarja përfundimtare e pushtetit parlamentar mbetet e lëkundshme.

Burim: Zëri
— Redaksia ZHURMA