Vlorë: Dy mina të fshehura në murin e një pallati
Forcat xheniere ndërhyjnë në Vlorë pas zbulimit të dy minave në murin e një pallati.
Redaksia ZHURMA · · 1 min lexim
VLORË — Dy mina janë zbuluar në murin e një pallati katërkatësh në lagjen «Pavarësia» të Vlorës, pranë zonës së Aleksandrisë. Mjetet shpërthyese janë konstatuar nga banorët gjatë orëve të pasdites, pasi amortizimi i murit në hyrje të ndërtesës, pranë një sahati të energjisë elektrike, ka bërë që ato të bëhen të dukshme.
Pas njoftimit të mbërritur në Drejtorinë Vendore të Policisë së Vlorës, efektivët kanë shkuar në vendngjarje, kanë siguruar perimetrin dhe kanë pritur ndërhyrjen e forcave xheniere, të cilat kanë bërë të mundur largimin e minave dhe shmangien e rrezikut për banorët.
Sipas të dhënave paraprake, mjetet shpërthyese dyshohet se ndodheshin aty prej shumë vitesh dhe se mund t'i përkasin vitit 1997, ndërsa rrethanat e vendosjes së tyre mbeten për t'u sqaruar.
