Vdes 71-vjeçarja në Koshare të Ferizajt
Pse humbi jetën gruaja 71-vjeçare në një bunar?
FERIZAJ — Një ngjarje e rëndë ka ndodhur mesditën e së martës në fshatin Koshare të Ferizajt, ku një grua 71-vjeçare ka humbur jetën pasi ka rënë në një bunar. Lajmin e ka konfirmuar për media zëdhënësi i Policisë për rajonin e Ferizajt, Kanun Veseli.
Sipas tij, rasti është raportuar rreth orës 13:00 dhe menjëherë në vendin e ngjarjes kanë dalë policët e stacionit, hetuesit dhe krim-teknikët rajonalë. Një njësi e Brigadës së Zjarrfikësve ka ndërhyrë aty dhe ka nxjerrë trupin nga pusi.
Për rastin është njoftuar prokurori i shtetit, i cili ka autorizuar ndërmarrjen e të gjitha veprimeve hetimore. Rasti është iniciuar si “Hetim mbi vdekjen” , ndërsa me urdhër të prokurorit, trupi i pajetë është dërguar në Institutin e Mjekësisë Ligjore (IML) në Prishtinë për kryerjen e autopsisë.
Burim: Sinjali
— Redaksia ZHURMA