Valdrin Sahiti tregon rrugën e suksesit te emrat ndërkombëtarë

Stilisti Valdrin Sahiti ka krijuar veshje për më shumë se 30 emra të njohur ndërkombëtarë nga Hollywood-i deri në Lindjen e Mesme, si Beyonce, Jennifer Lopez, Mariah Carey, Nicki Minaj, Cardi B, Kylie Jenner, Khloe Kardashian, Rita Ora, Paris Hilton dhe Bebe Rexha. I ftuar në emisionin «Goca dhe Gra», ai zbuloi rrugëtimin e tij profesional dhe faktorët që e kanë ndihmuar të arrijë suksesin jashtë kufijve.

Ndërtimi i kësaj karriere ka nisur që në moshë të re, kur hapësira e vendlindjes nuk përputhej më me synimet e tij personale. Fillimi i kalimit të kufijve nisi së pari në mendje, për t'u shndërruar më pas në hapa konkretë biznesi pasi ai bindet për mundësitë e veta. Debutimi global i brand-it daton në vitin 2017, zhvillim ky që rrodhi si pasojë e përdorimit të rrjetit social Instagram dhe teknologjisë dixhitale.

Gjatë rrëfimit të tij, Sahiti shpjegoi se depërtimi te personazhet e famshme ka funksionuar në mënyrë organike. Ai tha se një brand shqiptar apo kosovar nuk mund të përballojë buxhete që mbulojnë veshjen ose promocionin direkt në nivelin më të lartë të personazheve të famshëm. Sipas tij, kthimi i vazhdueshëm i këtyre emrave ndërkombëtarë te marka ka shërbyer për të konfirmuar seriozitetin e punës së tij. Stilisti njoftoi se ngritja e markës ka pasur vështirësi të dyfishta për shkak të pengesave që lidhen me vendin e origjinës, duke përmendur çështje nga mosnjohja dhe ekzistenca shtetërore e deri te pengesat me pagesat elektronike.

Sa i përket funksionimit të mëtejshëm të aktivitetit të tij, Sahiti nënvizoi se puna kërkon vazhdimësi. Sipas tij, talenti mbetet një dhunti me të cilën njeriu lind, por zhvillimi i tij varet plotësisht nga kontrolli i përditshëm i procesit të punës dhe përkushtimi i gjatë në këtë industri.

«Kam filluar në momentin që kufijtë e vendlindjes nuk kanë qenë kufijtë e ambicieve të mia. Sepse jo çdo vendlindje ka hapësirë për mendimin e lirë dhe jo çdo mendim i lirë rikthehet në ambicie. Unë mendoj që, mbase kam filluar dhe shumë i ri, kjo ka qenë ndër fazat kryesore të kalimit të kufijve në ambicie, në mendje. E pastaj kur e kam bindur veten se unë mendoj se ‘unë mund ta bëj’, e kam bërë», deklaroi Sahiti.

Ai shtoi se vlerëson rolin e punës së përditshme përballë dhuntive natyrore: «Unë besoj fuqishëm në talent dhe mendoj që talenti është dhuntia që natyra i ofron njeriut në këmbim të përsosmërisë së njeriut. Por besoj fuqishëm në anën tjetër, që këmbëngulja dhe disiplina janë faktori numër një i suksesit. Me talentin lindim dhe jo të gjithë e kanë, është një dhuratë nga natyra, një prekje e Zotit. Këtë e kam dëshmuar nga vetja, nga ekipi, nga njerëzit që kam punuar, nga kolegë, nga këngëtarët, nga njerëzit që rrin, e kupton që njerëzit e talentuar nuk janë njerëz të zakonshëm. Por mendoj që konsistenca dhe disiplina janë dy gjërat kryesore që e mbështesin talentin dhe i japin talentit formë».