Kush përfiton nga vaksinimi i djemve 13-vjeçarë kundër HPV-së?
Pas të dhënave të studimit në 'The Lancet', Shqipëria ka nisur vaksinimin e djemve për të eliminuar rrezikun nga kanceret e shkaktuara nga ky virus.
TIRANË — Shqipëria ka zgjeruar kalendarin e vaksinimit të detyrueshëm, duke përfshirë këtë vit edhe djemtë 13-vjeçarë. Iniciativa synon mbrojtjen kundër Human Papilloma Virus (HPV), një virus që besohet se shkakton deri në 99% të rasteve të kancerit të qafës së mitrës tek gratë, por që rrezikon edhe meshkujt.
Deri më tani, nga 15 mijë djem që i përkasin kësaj grupmoshe, janë vaksinuar 3400 të tyre. Ekspertja Rovena Daja deklaron se ka një interes të shtuar nga djemtë, duke shënuar se deri në këtë moment janë vaksinuar rreth 25% e tyre.
Kjo strategji mbështetet në të dhënat e studimit të botuar në revistën shkencore 'The Lancet'. Studimi tregon se personat që vaksinohen në moshën 12-13 vjeç kanë zero risk të vdesin nga kanceri i shkaktuar nga ky virus në të ardhmen.
Si shembull i suksesit, mediat ndërkombëtare vëndosin vëmendjen te Anglia, ku eliminimi i vdekjeve nga kanceret e shkaktuara nga HPV tek gratë dhe burrat e vaksinuar herët është një fakt. Për periudhën 2020-2024, në Angli janë shënuar zero raste vdekjeje.
Për të arritur rezultate të ngjashme si në Angli apo në vende të tjera që e kanë pasur këtë vaksinë më herët në kalendarin e detyrueshëm, mjekët theksuan se është e domosdoshme të rritet përqindja e vaksinimit tek djemtë në Shqipëri.
Paralelisht, ekspertët kujtojnë se prindërit nuk duhet të harrojnë obligimet e tjera shëndetësore për këtë moshë. Përveç vaksinës kundër HPV-së, në këtë fazë duhet të aplikohet edhe vaksina që mbron nga difteria dhe tetanozi.
Shtimi i djemve në kalendarin e vaksinimit shënon një hap drejt mbrojtjes gjithëpërfshirëse, duke thyer mitin se virusi HPV është një rrezik ekskluzivisht për gjininë femërore, ndërkohë që synon uljen e vdekjeve afatgjata nga kanceret.
Burim: Top Channel
— Redaksia ZHURMA