Urdhërohet strehimi i ushtarakëve amerikanë në Britani pas dyshimeve për dronë

Personeli ushtarak amerikan në bazën ajrore RAF Lakenheath në Mbretërinë e Bashkuar u urdhërua të strehohet në ambiente të sigurta pas dyshimeve për praninë e dronëve të paautorizuar mbi këtë bazë kryesore ushtarake. Sipas të dhënave të publikuara nga Sky News, nuk ka pasur persona të lënduar dhe as dëme materiale në infrastrukturë apo avionë.

Ngjarja në këtë bazë ajrore vjen pas disa zhvillimeve të mëparshme të sigurisë ku ushtria e Shteteve të Bashkuara të Amerikës pati zhvendosur më shumë se 12 avionë luftarakë nga baza RAF Mildenhall në Suffolk, si rrjedhojë e raportimeve për kërcënime të lidhura me Iranin. Të paktën dy prej këtyre mjeteve fluturuese u transferuan atëherë pikërisht në RAF Lakenheath. Po ashtu, muajin e kaluar, bombarduesit amerikanë u tërhoqën nga baza RAF Fairford drejt territorit amerikan pas kërcënimeve të tjera të lidhura me Iranin, megjithëse autoritetet nuk kanë konfirmuar ndonjë lidhje mes incidentit të fundit me dronë dhe kërcënimeve të mëparshme.

Gjatë incidentit, personelit të Forcave Ajrore të SHBA-së iu kërkua të qëndrojë në ambiente të mbyllura ndërsa nisi verifikimi i situatës. Sky News siguroi një kopje të alarmit të dërguar brenda bazës, i cili ishte shkruar me shkronja kapitale dhe mbante shprehjen «BOTA REALE» të theksuar me ngjyrë të kuqe. Lidhur me këtë ngjarje, deputeti lokal Nick Timothy njoftoi në rrjetet sociale se kishte komunikuar me autoritetet dhe se incidenti tashmë është zgjidhur pa pasur ndonjë kërcënim për publikun.

Një zëdhënës i Forcave Ajrore Amerikane konfirmoi reagimin e ekipeve të sigurisë ndaj lëvizjeve të dyshimta të dronëve dhe deklaroi se institucionet amerikane po bashkëpunojnë ngushtë me ato britanike për mbrojtjen e ushtarakëve, civilëve, kontraktorëve dhe familjeve të tyre në këtë bazë që strehon trupa dhe avionë luftarakë.