Sekuestrohen rreth 17 milionë euro të groposura nga ish-ministri hungarez

Autoritetet hungareze kanë zbuluar dhe sekuestruar shuma të mëdha parash të gatshme, të fshehura në vende të ndryshme përfshirë pyje, ndërtesa, depo fermash, banesa private dhe një kasafortë sigurie në një zonë të largët. Sipas Shërbimit Kombëtar të Rimëkëmbjes dhe Mbrojtjes së Aseteve, gjatë një operacioni dyditor të zhvilluar të enjten dhe të premten janë sekuestruar gjithsej 5,071,632,000 forinta hungareze, 2,658,350 euro dhe 1,257,100 dollarë, ku vlera e përgjithshme arrin në rreth 17.7 milionë euro.

Operacioni lidhet me hetimet ndaj ish-ministrit të Zhvillimit të Hungarisë, Miklos Sesztak, i cili shërbeu në këtë post nga viti 2014 deri në vitin 2018 gjatë qeverisjes së Viktor Orban. Ish-ministri akuzohet për marrje ryshfeti në një çështje që ka të bëjë me blerjen e autobusëve të përdorur nga kompania shtetërore e transportit me çmime të fryra, ndërsa raportohet se ai është arrestuar dhe ndodhet në paraburgim.

Kryeministri aktual i Hungarisë, Peter Magyar, i cili fitoi zgjedhjet e prillit duke i dhënë fund 16 viteve të qeverisjes së Orban, u zotua të hetojë akuzat për korrupsion dhe abuzim me pushtetin nga qeveria e kaluar. Magyar deklaroi se njoftimi i agjencisë shtetërore «shënon zyrtarisht fundin e mafias Fidesz-KDNP», duke iu referuar partive të koalicionit të mëparshëm. Nga ana e tij, Viktor Orban nuk ka pasur reagim ndaj këtyre zhvillimeve, ndërsa në të kaluarën i kishte cilësuar hetimet ndaj njerëzve të afërt me të si persekutim politik me qëllim burgosjen e tij.