Gatishmëri e lartë në SHBA pas sinjalizimeve për një plan iranian sulmi

Shërbimet e sigurisë në Shtetet e Bashkuara kanë ngritur nivelin e gatishmërisë pas informacioneve për një plan të dyshuar iranian që përfshin sulme me dronë ndaj presidentit amerikan Donald Trump dhe zyrtarëve të lartë të administratës. Sipas gazetës izraelite „Israel Hayom“, shërbimi sekret izraelit Mossad i ka përcjellë CIA-s të dhëna specifike lidhur me këtë kërcënim, pas një kërkese nga agjencitë amerikane të inteligjencës për të verifikuar të dhënat. Si pasojë e këtyre zhvillimeve, presidenti ka kufizuar daljet publike, ndërsa zyrtarë të tjerë, përfshirë sekretarin e Thesarit Scott Bessent, janë zhvendosur në ambiente me masa të shtuara sigurie.

Ky zhvillim pason një sërë paralajmërimesh të mëparshme të transmetuara gjatë muajve të kaluar, ku përfshiheshin skenarë nga përdorimi i snajperëve te rreziku i mundshëm gjatë samitit të NATO-s në Turqi, ku presidenti u transferua në një tjetër avion ushtarak. Megjithatë, zyrtarët amerikanë më parë kishin vlerësuar disa prej informacioneve me shkallë të ulët besueshmërie dhe nuk kishin arritur t'i verifikonin në mënyrë të pavarur, ndërsa pala izraelite ka hedhur poshtë pretendimet se përdor raportimet për të ndikuar në politikën e Uashingtonit ndaj Teheranit.

Në këtë kuadër tensionesh, kreu i Mossadit, Roman Gofman, po zhvillon takime në Shtetet e Bashkuara me zyrtarë të lartë të administratës për të diskutuar zhvillimet në Iran dhe opsionet e mundshme të reagimit. Deri më tani, Shtëpia e Bardhë dhe CIA nuk kanë dhënë një konfirmim zyrtar për ekzistencën e një plani konkret atentati.