Pse ul Qeveria e RMV-së doganat për 70 mallra?
Qeveria miraton ndryshimet e Ligjit të Tarifës Doganore, duke ulur normat për lëndë të para dhe komponentë prodhimi.
Redaksia ZHURMA · · Përditësuar · 1 min lexim
SHKUP — Qeveria e Republikës së Maqedonisë së Veriut miratoi sot ndryshimet e Ligjit të Tarifës Doganore, me të cilin normat doganore për 70 mallra ulen më tej dhe harmonizohen plotësisht me ato të Bashkimit Evropian. Njoftimi vjen nga Ministria e Financave.
Ky është vazhdim i ndryshimeve të vitit të kaluar që hynë në fuqi më 1 korrik 2025, kur normat u ulën deri në 50% të nivelit të BE-së. Ulja e re përfshin lëndët e para, repromaterialet dhe komponentët që përdoren në kapacitetet prodhuese vendase, me synim rritjen e konkurrueshmërisë eksportuese të industrisë maqedonase.
Propozimligji u përgatit në konsultim me Odën Ekonomike të vendit dhe parasheh harmonizim të plotë me Tarifën doganore të BE-së, duke respektuar edhe rregullat e Organizatës Botërore të Tregtisë. Sipas MF-së, masa do të ketë efekte afatgjata në rritjen ekonomike, prodhimin industrial dhe konkurrueshmërinë e eksportit, veçanërisht për industrinë e automobilave, përpunimit të metaleve dhe metalurgjinë.
Burim: Telegrafi
— Redaksia ZHURMA
