Uji në Kumanovë dhe Shkup është i sigurt për pije
Analizat zyrtare konfirmojnë se uji i pijshëm në Kumanovë dhe Shkup plotëson të gjitha kriteret mikrobiologjike dhe kimike për konsum.
KUMANOVË — Uji në sistemin ujësjellës të Kumanovës është plotësisht i sigurt për pije, sipas analizave të deritanishme nga Qendra për Shëndet Publik, laboratori i Stacionit Filtrues dhe Instituti për Shëndet Publik. Toni Jonçevski, udhëheqës i Stacionit Filtrues në Kumanovë, bëri të ditur se uji kontrollohet nga 11 vende matëse dhe se nuk ka prishje të mëdha, pavarësisht temperaturave të larta të verës.
Ndërkohë, në kryeqytet, kryetari i Shkupit, Orce Gjorgjievski, deklaroi se uji i pijshëm në Shkup i plotëson kriteret mikrobiologjike dhe kimike. Ai u bëri thirrje qytetarëve të mos shqetësohen nga informacionet e fundit, duke sqaruar se deponia e diskutuar nuk ndodhet në territorin e Shkupit, por rreth 30 kilometra larg burimit të “Rashçes”. Sipas autoriteteve, burimi kontrollohet 24 orë në ditë dhe mostrat analizohen rregullisht në laboratorë.