UEFA heq kualifikimin automatik për pritësit e Euro 2028
Të 55 përfaqësueset evropiane do të marrin pjesë në 12 grupe, me fituesit dhe tetë kombëtaret më të mira të vendit të dytë që sigurojnë direkt kualifikimin.
NYON — UEFA miratoi një sistem të ri për kualifikimet e Euro 2028, duke vendosur që vendet organizatore të marrin pjesë në eliminatore dhe të mos kenë më kualifikim automatik. Anglia, Skocia, Uellsi dhe Republika e Irlandës — të katër pritësit e turneut — duhet tani të kualifikohen përmes eliminatoreve.
Sipas formatit të ri, të 55 përfaqësueset evropiane, përfshirë pritësit, do të marrin pjesë në kualifikime. Skuadrat do të ndahen në 12 grupe, me nga katër ose pesë ekipe secili. Fituesit e çdo grupi dhe tetë kombëtaret më të mira të vendit të dytë sigurojnë direkt kualifikimin, duke plotësuar 20 nga 24 vendet e fazës finale.
UEFA ka parashikuar një mekanizëm sigurie: dy nga katër vendet e mbetura do të rezervohen për organizatorët që dështojnë në eliminatore. Nëse tre ose katër organizatorë mbeten jashtë, dy vendet rezervë u jepen dy ekipeve organizatore me renditjen më të mirë.
Vendimi e dallon qartë Evropën nga modeli i FIFA-s, e cila i ka garantuar Argjentinës, Paraguait dhe Uruguait nga një vend secilit në Kupën e Botës 2030. Argjentina e ka siguruar tashmë vendin, pasi do të organizojë një nga ndeshjet festive të turneut, në kuadër të 100-vjetorit të Kampionatit Botëror. Vendimi i FIFA-s ka nxitur polemika mes tifozëve, sipas The Sun.
Euro 2028 do të zhvillohet në katër shtete — Angli, Skoci, Uells dhe Republika e Irlandës. Ndeshjet në Angli do të luhen te Wembley, Tottenham Hotspur Stadium, Etihad Stadium dhe tri stadiume të tjera. Vendimi i UEFA-s shënon një ndryshim të madh nga praktika e deritanishme, ku organizatorët kualifikoheshin automatikisht.
Burim: Shenja
— Redaksia ZHURMA