UEFA cakton 27 gushtin për shortin e Ligës së Kampionëve
Faza e ligës zhvillohet më 27 gusht, me 36 klube pjesëmarrëse
GJAKOVË — Futboll UEFA ka njoftuar se shorti për fazën e ligës së Ligës së Kampionëve për sezonin 2026/27 do të zhvillohet më 27 gusht 2026, një ditë pas përfundimit të fazës së play-off-it. Në short do të marrin pjesë gjithsej 36 klube. Prej tyre, 29 ekipe do të sigurojnë kualifikimin direkt, ndërsa shtatë të tjera do të përcaktohen përmes ndeshjeve të play-off-it, të cilat përfundojnë më 26 gusht.
Edhe në edicionin e ri do të vazhdojë të aplikohet formati i ri i Ligës së Kampionëve, ku faza tradicionale e grupeve është zëvendësuar me një ligë të vetme prej 36 skuadrash. Pas përfundimit të kësaj faze, tetë ekipet e para në renditje do të kualifikohen direkt në raundin e 16-të, ndërsa skuadrat që pozicionohen nga vendi i nëntë deri në të 24-in do të luajnë në fazën shtesë për të siguruar tetë vendet e tjera në fazën eliminatore.
Të gjitha skuadrat pjesëmarrëse në edicionin e ri do të mësohen pas përfundimit të ndeshjeve kualifikuese, para hedhjes së shortit në fund të gushtit. Burim: Sinjali, https://sinjali.com/uefa-cakton-daten-e-shortit-te-liges-se-kampioneve-2026-27/
— Redaksia ZHURMA