Si e vë në pikëpyetje nervozizmi i Dhomave të Specializuara legjitimitetin sipas Trompit?

PRISHTINË — Ish-hetuesja në Tribunalin Penal Ndërkombëtar për ish-Jugosllavinë, Nevenka Tromp, ka kritikuar ashpër reagimin e Dhomave të Specializuara të Kosovës ndaj një raporti të Komitetit të Odës së Avokatëve për të Drejtat e Njeriut të Anglisë dhe Uellsit.

"Nervozizmi i gjykatës mbi këtë raport nuk është mënyra e duhur se si veprohet", tha Tromp në një intervistë për Klan Kosova. Sipas saj, asnjë vëzhgues serioz nuk mund të thotë se gjykata do të duhet të reagojë gjatë kohës që është duke marrë një vendim, sepse "dëshmitë kryesore janë kryer dhe ne vetëm po presim vendimin e shkallës së parë".

Tromp paralajmëroi se ky nervozizem, nëse perceptohet si përpjekje për të ndikuar tek gjyqtarët, "do të ndikojë në mënyrën se si do të pranohet vendimi nga kosovarët". Ajo e vuri theksin tek një pikë më të gjerë: "E vendos në dyshim legjitimitetin e kësaj gjykate dhe pikëpamjen nëse kjo gjykatë është objektive dhe e paanshme".

Duke u referuar eksperiencës së saj në ICTY, Tromp krahasoi situatën me atë të Tribunalit Ndërkombëtar për ish-Jugosllavinë, ku presidentja e tij kishte theksuar se drejtësia duhej "të fitojë zemrat dhe mendjet e popullit". Ajo paralajmëroi se Dhomat e Specializuara rrezikojnë "delegjitimimin" dhe vënien në pikëpyetje të kredibilitetit nëse vendimi pranohet "në një mënyrë të pafavorshme" nga komuniteti i Kosovës. "Ky është problem i madh, nuk është një çështje që cilado gjykatë do mund ta merrte me lehtësi", shtoi ajo.

Burim: Zëri
— Redaksia ZHURMA