Tragjedi në Ferizaj: Punëtori bie nga kati përdhes në bodrum dhe vdes

FERIZAJ — Një person i moshës 54-vjeçare ka humbur jetën gjatë orëve të pasdites në një objekt në ndërtim në rrugën «Cen Dugolli» në Ferizaj, pasi dyshohet se është rrëzuar nga kati përdhes në bodrum gjatë kryerjes së punimeve ndërtimore. Rasti ka ndodhur rreth orës 15:40.

Lajmin për media e ka konfirmuar zëdhënësi i Policisë për rajonin e Ferizajt, Kanun Veseli, i cili ka treguar se në vendin e ngjarjes kanë dalë menjëherë zyrtarët policorë, patrulla e stacionit dhe ekipet e Emergjencës, të cilat kanë konstatuar vdekjen e viktimës.

Në lokacion kanë dalë edhe hetuesit rajonalë për t'u marrë me hetimin e rrethanave të ngjarjes, ndërsa janë njoftuar edhe inspektorët e punës. Për të gjitha veprimet e ndërmarra policore është njoftuar prokurori i shtetit.