Maqedonci dhe ambasadori i SHBA-së në NATO diskutojnë për helikopterët Black Hawk

Ministri i Mbrojtjes i Kosovës, Ejup Maqedonci, u takua me Përfaqësuesin e Përhershëm të SHBA-së në NATO, ambasadorin Matthew Whitaker, në margjinat e Warsaw Security Forum 2026.

Sipas njoftimit të Ministrisë së Mbrojtjes, në fokus të takimit ishte «avancimi i bashkëpunimit bilateral në fushën e mbrojtjes dhe koordinimi për çështje me interes të përbashkët». Maqedonci u shpreh mirënjohës për mbështetjen e vazhdueshme të SHBA-së për Kosovën, ministrinë dhe Forcën e Sigurisë së Kosovës, ndërsa theksoi rëndësinë e bashkëpunimit me Gardën Kombëtare të Iowa-s që zhvillohet prej më shumë se 15 vjetësh në kuadër të Programit të Partneritetit Shtetëror.

Në takim u diskutua gjithashtu për procedurat e nisura për blerjen e helikopterëve «Black Hawk», zhvillimin e kapaciteteve mbrojtëse, industrinë vendore të mbrojtjes dhe prokurimet ushtarake. Ambasadori Whitaker shprehu mbështetjen për rrugëtimin e Kosovës drejt integrimit në NATO dhe zhvillimin e kapaciteteve të saj mbrojtëse.

Po ashtu, u bisedua për bashkëpunimin me NATO-n lidhur me praninë dhe optimizimin e KFOR-it, normalizimin e hapësirës ajrore të Kosovës, si dhe mundësitë e bashkëpunimit sipas parimit të ndarjes së përgjegjësive në kampin Bondsteel dhe në Aeroportin e Gjakovës.