Ku kishte shërbyer togeri i dënuar për spiunazh përpara arrestimit?
Bojan Jevtiq, i dënuar me 6 vjet burg për spiunazh, kishte qenë pjesëtar i Policisë së Serbisë që nga 2009 dhe rezervist i Ushtrisë së saj.
PRISHTINË — Togeri i Policisë së Kosovës Bojan Jevtiq, i dënuar javën e kaluar për spiunazh, ishte gjithashtu pjesëtar i Policisë së Serbisë dhe rezervist i Ushtrisë së saj, sipas aktakuzës së Prokurorisë Speciale që e ka siguruar Televizioni i Kosovës.
Në aktakuzë, të udhëhequr nga prokurori special Bekim Kodraliu, thuhet se gjatë bastisjes së shtëpisë së Jevtiqit u gjetën dokumentacione që dëshmojnë se ai të paktën që nga viti 2009 ishte pjesëtar i Policisë së Serbisë. U gjet gjithashtu dëshmi se ai ishte rezervist i Ushtrisë së Serbisë. Jevtiq i ka pranuar të gjitha këto gjatë gjykimit.
Sipas aktakuzës, Jevtiq i kishte raportuar drejtorisë paralele të Policisë së Gjilanit me bazë në Vranjë të Serbisë. Ai u dënua me gjashtë vjet burg dhe 2 mijë euro gjobë për spiunazh dhe armëmbajtje pa leje, duke u bërë zyrtari i parë i Policisë së Kosovës i dënuar për spiunazh.
Burim: Zëri
— Redaksia ZHURMA