Teliti: Qytetarët do të paguajnë 200 milionë euro më shumë në 2027

Këshilltari për çështjet ekonomike në Partinë Demokratike, Dorian Teliti, ka deklaruar se qytetarët dhe bizneset do të paguajnë rreth 200 milionë euro më shumë gjatë vitit 2027 për shkak të paketës së re fiskale. I ftuar në emisionin “Minuta e Parë” dhe në News24, ai u shpreh se paketa përbën një barrë shtesë për ekonominë, duke kundërshtuar pretendimet se ajo do të jetë asnjanëse.

Sipas Telitit, pavarësisht se parashikohet ulje e TVSH-së për 54 produkte, efekti i kësaj mase nuk do të reflektohet në ulje çmimesh për konsumatorët. Këshilltari ekonomik argumentoi se një ulje e tillë do të jepte efekt të plotë vetëm në kushtet e një tregu me konkurrencë të lirë dhe të ndershme. Ai theksoi se Shqipëria nuk zotëron një treg të tillë, por një treg oligopolistik, ku importi dhe tregtimi i pjesës më të madhe të produkteve kontrollohet nga një grup i kufizuar operatorësh.

Gjatë paraqitjes së tij, Teliti ironizoi gjithashtu justifikimet e mundshme të mazhorancës në janar, nëse lehtësimi fiskal nuk do të jepet në faturat e qytetarëve. Për më tepër, ai ngriti shqetësimin për rritjen e TVSH-së nga 20% në 21%, duke paralajmëruar se kjo lëvizje do të sjellë shtrenjtimin e të gjitha produkteve të tjera që mbeten jashtë 54 kategorive të përfshira në ulje.

«Nëse thuhet se kjo paketë do të jetë asnjanëse, jemi në një derexhe. Qytetarët do të paguajnë 200 milionë euro më tepër vitin e ardhshëm», u shpreh ai ndër të tjera, duke shtuar se zërat e marrë një e nga një tregojnë rritjen e përgjithshme të faturës financiare për familjet dhe bizneset shqiptare.