Të akuzuarit për sulmin në Ibër-Lepenc deklarohen sërish të pafajshëm

Të akuzuarit Jovan Viqentijeviq, Dragisha Viqentijeviq dhe Igor Dimoviq janë deklaruar sërish të pafajshëm në seancën e mbajtur në Gjykatën Themelore në Prishtinë, lidhur me sulmin e ndodhur në kanalin e Ibër-Lepencit, ndërsa procesi gjyqësor është caktuar të vazhdojë më 17 dhjetor në orën 13:00.

Shpërthimi në kanalin e Ibër-Lepencit ndodhi në nëntor të vitit 2024 në fshatin Varagë të Zubin-Potokut, duke shkaktuar dëme në infrastrukturën jetike të furnizimit me ujë dhe duke ngritur shqetësime për sigurinë e infrastrukturës kritike në Kosovë, ndërsa autoritetet e vendit e kanë cilësuar ngjarjen si sulm terrorist dhe e kanë bërë Serbinë përgjegjëse për të.

Seanca e fundit u zhvillua në Departamentin Special të Gjykatës Themelore në Prishtinë me një përbërje të re të trupit gjykues, pas pensionimit të gjyqtarit Vesel Ismaili, siç raportuan mediat. Trupi i ri gjykues udhëhiqet nga gjyqtari Leon Përlaska, ndërsa anëtarë të tij janë Lutfi Shala dhe Kujtim Krasniqi. Pas deklarimit të të akuzuarve, të cilët mohuan akuzat, prokurori Bekim Kodraliu bëri të ditur se mbetet prapa fjalës hyrëse të paraqitur më herët. Sipas dosjes së Prokurorisë Speciale të Republikës së Kosovës, Jovan Viqentijeviq dyshohet se, së bashku me vëllain e tij Dragisha Viqentijeviq, ka dëmtuar qëllimisht infrastrukturën e kanalit duke përdorur rreth 20 kilogramë eksploziv, me qëllim të kryerjes së veprës penale të terrorizmit. Në këtë rast është i akuzuar edhe Igor Dimoviq, i cili ndryshe nga vëllezërit Viqentijeviq që po mbahen në paraburgim, nuk ndodhet në paraburgim.

Me ndryshimin e trupit gjykues, gjykimi ka nisur rishtazi, por palët janë pajtuar që dëshmitë e dhëna më parë të konsiderohen të lexuara dhe dëshmitarët e dëgjuar në fazat e mëparshme të mos thirren sërish, me qëllim shmangien e përsëritjes së tyre, ka bërë të ditur kryesuesi i trupit gjykues, Leon Përlaska. Kryetari i ri i trupit gjykues njoftoi se do të respektohet radha e dëshmitarëve e përcaktuar nga përbërja e mëparshme, pasi janë aprovuar disa dëshmitarë dhe është paracaktuar radha e thirrjes së tyre. Po ashtu, gjykata njoftoi se kanë mbetur disa propozime të mbrojtësve pa u vendosur, për të cilat është marrë mendimi i prokurorit.

Në seancën e radhës, e cila do të mbahet më 17 dhjetor, do të dëshmojë Tijana Viqentijeviq, e cila është familjare e të akuzuarve Dragisha dhe Jovan Viqentijeviq, ndërsa procesi do të vazhdojë edhe me dëgjimin e dëshmitarëve të tjerë të paraparë në këtë çështje penale.