Tahiri: Gjetjet e Komisionit Evropian nuk janë dokument i opozitës

Gjatë seancës së jashtëzakonshme kushtuar Raportit të Progresit, shefi i Grupit Parlamentar të PDK-së, Arian Tahiri, ka adresuar kritika të forta ndaj Qeverisë Kurti, duke kërkuar që gjetjet e Komisionit Evropian të trajtohen me përgjegjësi të lartë institucionale. Sipas tij, ekzekutivi duhet të reflektojë dhe të lërë mënjanë arsyetimet e propagandën përballë vlerësimeve të dala nga institucionet evropiane.

Tahiri theksoi se dokumenti në fjalë nuk i përket asnjë partie politike dhe nuk shërben për interesat e opozitës, por përbën një pasqyrë zyrtare të progresit të Republikës së Kosovës. Ai përmendi se raporti evidenton mangësi në fushën e demokracisë, drejtësisë, ekonomisë dhe funksionimit të institucioneve, duke shtuar se paraliza e zgjatur institucionale dhe mbikëqyrja e kufizuar e ekzekutivit përbëjnë paralajmërime serioze.

«Raporti i Komisionit Evropian nuk është dokument i opozitës, i PDK-së, LDK-së e Aleancës. Nuk është shkruar për t’i shërbyer interesit të asnjë partie politike», ka deklaruar ai, duke shtuar se posedimi i votave nuk i jep askujt të drejtë ta trajtojë shtetin si pronë politike.