Haxhiu diskuton me Schuebel përshpejtimin e reformave dhe integrimin evropian

Kryetarja e Kuvendit të Kosovës, Albulena Haxhiu, ka pritur në takim ambasadorin e Bashkimit Evropian në Kosovë, Dirk Schuebel, për të diskutuar rreth Raportit të Komisionit Evropian dhe perspektivës evropiane të vendit. Gjatë këtij takimi është trajtuar procesi i reformave, ndërsa Haxhiu ka theksuar se kthimi i Kuvendit në punë ofron mundësi për t'i dhënë ritëm të ri adresimit të ngecjeve të evidentuara në raportet evropiane. «Tani që Kuvendi i është kthyer punës, kemi mundësinë t’i japim një ritëm të ri reformave dhe të shënojmë përparim në fushat ku janë evidentuar ngecje», ka shkruar ajo në rrjete sociale.

Biseda mes tyre është përqendruar edhe tek Agjenda e Reformave, Plani i Rritjes, respektimi i afateve të përcaktuara për detyrimet, si dhe shqyrtimi i aplikimit të Kosovës për anëtarësim në Bashkimin Evropian. Haxhiu ka shprehur gatishmërinë për forcimin e bashkëpunimit ndërmjet Kuvendit dhe Zyrës së BE-së në drejtim të procesit legjislativ dhe mbikëqyrjes së zbatimit të reformave. Ajo ka vlerësuar se ky proces kërkon angazhim nga të gjitha institucionet. «Rruga drejt Bashkimit Evropian kërkon punë të vazhdueshme, përkushtim dhe përgjegjësi nga të gjitha institucionet», theksoi ajo.