Tabaku akuzon qeverinë: Po shuhen fabrikat e fasonit

TIRANË — Deputetja e Partisë Demokratike, Jorida Tabaku, ka ngritur alarmin për mbylljen me shpejtësi të bizneseve të fasonerisë, duke e cilësuar situatën pasojë e drejtpërdrejtë e politikave dhe e mungesës së vizionit ekonomik të qeverisë Rama.

"Pas 13 vitesh në qeveri, socialistët, në kulmin e pushtetit të tyre, u kanë lënë mbi 175 mijë familjeve shqiptare një kartolinë të hidhur: zhbërjen e industrisë fason", deklaroi Tabaku. Sektori që dikur punësonte mbi 175 mijë shqiptarë ka mbetur pa mbështetje dhe subvencione, përballë zhvlerësimit të euros, kostove të larta dhe barrës së taksave.

Mbyllja e fabrikave po godet jo vetëm sipërmarrësit, por edhe mijëra familje që sigurojnë të ardhurat nga ky sektor. Tabaku paralajmëroi se Shqipëria rrezikon të humbasë markën "Made in Albania", ndërsa biznese të shumta po nxirren në shitje dhe sipërmarrësit po transferojnë pajisjet dhe aktivitetin e tyre jashtë vendit.

Ajo akuzoi qeverinë se ka dëmtuar konkurrencën dhe ekonominë përmes tolerimit të parave të pista dhe lidhjeve me krimin e organizuar, pa hartuar politika për mbrojtjen e prodhimit dhe punësimit. "Pa prodhim nuk ka vende pune, eksporte dhe ekonomi të qëndrueshme. Shqipërisë i duhet një model ekonomik që mbështet sipërmarrjen dhe punën", përfundoi Tabaku.

Burim: Gazeta Tema
— Redaksia ZHURMA