Tabaku: Kërkesa për qeveri teknike u ngrit në Komisionin e Jashtëm të PE-së

Kërkesa për krijimin e një qeverie teknike për të garantuar zgjedhje të lira e të ndershme u ngrit gjatë diskutimit për Shqipërinë në Komisionin e Jashtëm të Parlamentit Europian (AFET), sipas deputetes së Partisë Demokratike, Jorida Tabaku. Pas mbledhjes, eurodeputeti David McAllister kishte deklaruar më parë se propozimi për një qeveri teknike jep shpresë për zgjedhje të lira.

Në një video të publikuar në rrjetet sociale pas përfundimit të mbledhjes në AFET, deputetja e Partisë Demokratike njoftoi se gjatë takimit u trajtuan shqetësimet kryesore mbi situatën politike dhe demokratike në Shqipëri, duke përfshirë proceset zgjedhore, barazinë para ligjit dhe ecurinë e integrimit europian.

Sipas deputetes demokrate Tabaku, krimi i organizuar ka penguar rotacionin politik në vend dhe ka ndikuar në proceset zgjedhore. Në këtë kuadër, ajo tha se krijimi i një qeverie teknike u parashtrua si domosdoshmëri dhe rrugëdalje nga ngërçi politik për të siguruar procese zgjedhore të ndershme.

Çështje të tjera të diskutimit, sipas Tabakut, ishin liria e mediave, funksionimi i shtetit ligjor dhe zbatimi i ligjeve në praktikë përtej miratimit të tyre. Ajo bëri të ditur se në Parlamentin Europian u përcoll gjithashtu zëri i protestës, ku u ngrit shqetësimi për trajtimin jodinjitoz dhe shpesh të dhunshëm të protestuesve nga policia, si dhe dallimi në zbatimin e ligjit ndaj politikanëve të akuzuar për korrupsion krahasuar me qytetarët që protestojnë.

Deputetja Tabaku i cilësoi respektimin e të drejtave, trajtimin e protestuesve dhe lirinë e mediave si thelbin e procesit të integrimit europian të Shqipërisë.

«A trajtohet njësoj një politikan i korruptuar me një qytetar që proteston? A është sot perceptimi që kushdo që bën korrupsion mund të dalë i lirë?», deklaroi Tabaku gjatë reagimit të saj.