Sveçla: Kosova mbetet partner serioz i Europol-it

Ministri i Punëve të Brendshme, Xhelal Sveçla, është takuar me drejtorin e Europol-it, Jürgen Ebner, për të biseduar mbi bashkëpunimin dypalësh në luftimin e grupeve kriminale ndërkombëtare. Sveçla theksoi se vendi mbetet partner serioz i këtij institucioni, mbështetur në marrëveshjet e deritanishme dhe rezultatet e vazhdueshme. «Me z. Jürgen Ebner, Drejtor i Europol-it, rikonfirmuam sukseset e operacioneve tona të përbashkëta në luftimin e grupeve kriminale ndërkombëtare, që cenojnë sigurinë jo vetëm të vendit tonë, por edhe të rajonit e më gjerë», u shpreh ministri.

Gjatë takimit u përmend gjithashtu operacioni i fundit i njohur si «Trado 3», i cili u realizua më 3 nëntor nën udhëheqjen e Europol-it dhe në koordinim me shtatë shtete evropiane, përfshirë edhe Kosovën. Sipas ministrit, ky operacion dëshmon përkushtimin dhe seriozitetin e institucioneve vendase në goditjen e çdo aktiviteti të paligjshëm. Në përmbyllje, Sveçla bëri të ditur se partneriteti do të vijojë të thellohet për të arritur rezultate të reja në fushën e sigurisë dhe luftës kundër krimit të organizuar.