SPAK mbyll hetimet për Evis Berberin në dosjen Balluku

Prokuroria e Posaçme ka përfunduar hetimet dhe i ka komunikuar ish-drejtorit të Autoritetit Rrugor Shqiptar, Evis Berberi, akuzën për shkelje të barazisë së pjesëmarrësve në tendera apo ankande publike në 9 raste. Ish-zyrtari i lartë është marrë i pandehur brenda procedimit penal ku po hetohet edhe ish-zëvendëskryeministrja Belinda Balluku.

Ky zhvillim vjen pasi më 28 tetor SPAK njoftoi përfundimin e hetimeve për ish-zëvendëskryeministren Belinda Balluku dhe 25 persona të tjerë të përfshirë në të njëjtin procedim penal. Berberi kishte mbajtur poste drejtuese në institucionet në varësi të Ministrisë së Infrastrukturës gjatë kohës kur kjo dikaster drejtohej nga Balluku.

Hetimet e SPAK janë përqendruar në dyshimet për paracaktimin e fituesve të tenderave publikë dhe shkeljen e barazisë së pjesëmarrësve në procedurat e prokurimit, njoftuan Report Tv dhe BoldNews. Hetimet kanë analizuar mënyrën se si janë zhvilluar procedurat për disa nga projektet më të rëndësishme infrastrukturore në vend, ku përfshihen ndërtimi i Tunelit të Llogarasë dhe lotet e Unazës së Madhe të Tiranës, si dhe rolin e zyrtarëve dhe operatorëve ekonomikë. Sipas informacioneve të gazetares Klodiana Lala dhe gazetares Blerina Cene, Berberit i është komunikuar zyrtarisht marrja i pandehur për nëntë episode të shkeljes së barazisë në prokurime.

Përveç kësaj çështjeje, Evis Berberi është i pandehur edhe në një tjetër procedim të SPAK-ut për korrupsion pasiv, shkelje të barazisë në tendera dhe pastrim parash. Në atë dosje, hetimet kanë evidentuar dyshime se kompania “DAAM”, e drejtuar nga Valter Begaj por e kontrolluar faktikisht nga Berberi, ka përfituar gjashtë procedura prokurimi publik — tre gjatë kohës kur Berberi drejtonte Agjencinë për Efiçencën e Energjisë dhe tre kur ishte në krye të ARRSH-së. SPAK dyshon se përmes kësaj firme janë kanalizuar para nga subjekte të tjera për blerjen e pasurive të paluajtshme. Berberi u arrestua në mars të vitit 2024, ndërsa në prill të vitit 2026 prokuroria kërkoi dënimin e tij me 10 vite burg dhe konfiskimin e pasurive, masë që mund të ulet me një të tretën për shkak të gjykimit të shkurtuar.

Të pandehurit në dosjen “Balluku” tashmë janë njohur me përfundimet e hetimit. Pas përfundimit të afateve procedurale për paraqitjen e kundërshtimeve nga ana e mbrojtjes, dosja me 26 të pandehur pritet të kalojë zyrtarisht për shqyrtim dhe gjykim në Gjykatën e Posaçme.