Sulmi ajror ndaj rebelëve në Venezuelë lë 19 të vrarë
Nëntëmbëdhjetë persona janë vrarë në një sulm ajror të ushtrisë venezueliane ndaj një kampi të organizatës së armatosur ELN pranë kufirit.
Redaksia ZHURMA · · 1 min lexim
Një sulm ajror i ushtrisë venezueliane ka lënë të paktën 19 të vrarë në një kamp të organizatës së armatosur kolumbiane ELN, pranë kufirit me Kolumbinë. Ngjarja ka ndodhur të premten në Buena Vista del Meta, në shtetin Apure, ndërsa informacionet janë bërë të ditura nga ish-deputeti Juan Francisco Garcia Escalona, koordinator i organizatës për të drejtat e njeriut Fundaredes.
Sipas të dhënave paraprake, nëntë trupa janë dërguar në kryeqytetin e shtetit, San Fernando de Apure, për ekzaminime mjeko-ligjore, kurse 10 trupa të tjerë kanë mbetur në vendin e ngjarjes. Banorët e Puerto Paez kanë dorëzuar emra dhe të dhëna identifikuese të gjetura në vendin e sulmit, ndërsa identitetet e viktimave nuk janë konfirmuar zyrtarisht. Për sulmin ka reaguar edhe aktivistja Rocio San Miguel në rrjetin social X.
Garcia Escalona ka deklaruar se zona është përfshirë nga tensione dhe luftime të raportuara nga banorët e komunitetet indigjene në Los Pijiguaos dhe pranë Paso del Burro. Sipas tij, këto përplasje lidhen me konfliktet për kontrollin e territoreve të pasura me minerale, si boksiti dhe koltani.
