Rigon Llugiqi, shtylla dhe truri i mesfushës te Prishtina këtë sezon

PRISHTINË — Mesfushori Rigon Llugiqi po kalon një formë të shkëlqyer me Prishtinën, duke u shndërruar në një nga shtyllat kryesore të formacionit të drejtuar nga trajneri Orges Shehi. I pozicionuar përpara dy mbrojtësve, 23-vjeçari luan një rol qendror në lidhjen e reparteve, duke kontrolluar ritmin e lojës dhe duke ndërtuar aksionet e skuadrës bardhekaltër me një pjekuri që i kalon vitet e tij. Përveç qetësisë në zotërimin e topit dhe organizimit, ai shquhet edhe për kontributin e rëndësishëm në rikuperimin e sferës në fushë.

Gjatë këtij sezoni në Superligën e Kosovës, Llugiqi ka treguar një qëndrueshmëri të lartë në minuta, pavarësisht disa shqetësimeve fizike që pësoi në fillim të kampionatit. Ai u dëmtua në kyçin e këmbës në javën e tretë kundër Llapit, ku luajti vetëm 45 minuta, ndërsa në xhiron e katërt mungoi plotësisht ndaj Vushtrrisë. Një tjetër problem fizik e detyroi të largohej në minutën e 19-të ndaj Drenicës në javën e pestë. Megjithatë, në tetë ndeshjet e tjera ai ka luajtur nga minuta e parë deri në fund, duke u bërë i pazëvendësueshëm. I transferuar në vitin 2024 nga Ramiz Sadiku dhe me një eksperiencë të mëparshme te Yverdon Sport në Zvicër, mesfushori numëron tashmë 45 paraqitje dhe dy gola me fanellën kryeqytetase.

Forma e tij e lartë ka ndihmuar ndjeshëm Prishtinën në ecurinë pozitive të këtij edicioni. Pas 11 xhirove të para, skuadra ka grumbulluar 26 pikë dhe mban vendin e dytë në renditje, me pikë të barabarta me lideren Malisheva, ndërsa ndikimi i Llugiqit në zemër të mesfushës mbetet përcaktues për identitetin e lojës së ekipit.