Halilaj: Përgjegjësia për rastin e Arlinda Zekajt të bazohet në fakte

Vrasja e Arlinda Zekajt në Pejë ka tronditur opinionin publik dhe ka rikthyer vëmendjen te dështimet e institucioneve në mbrojtjen e grave që denoncojnë dhunën. Ngjarja ka nxitur protesta në disa qytete të Kosovës, ku qytetarët kërkojnë drejtësi dhe përgjegjësi nga organet shtetërore që nuk ndërmorën masat e duhura për mbrojtjen e saj pavarësisht paralajmërimeve. Pas ngjarjes tragjike, një deklaratë e ministres së Drejtësisë, Donika Gërvalla, në seancën e jashtëzakonshme të Kuvendit, nxiti reagime të shumta dhe kërkesa për dorëheqjen e saj dhe të ministrit të Punëve të Brendshme, Xhelal Sveçla.

Gërvalla sqaroi më pas se fjalët e saj ishin kundërpërgjigje ndaj deputetes së AAK-së, Time Kadrijaj, duke kërkuar që rasti të mos përdoret për përplasje politike. Debati është përqendruar te pyetja nëse vëmendja po largohet nga përgjegjësia konkrete e institucioneve dhe po shndërrohet në konflikt politik. Avokati Gazmend Halilaj vlerëson se tragjedia nuk duhet kthyer në mjet për llogaritë partiake. Sipas tij, përgjegjësia nuk mund të vendoset nga presioni publik, por duhet të analizohet mbi bazën e fakteve, detyrimeve ligjore dhe zinxhirit institucional të vendimmarrjes. «Rasti i Arlinda Zekajt duhet të shërbejë si një moment reflektimi mbi përgjegjësinë institucionale, funksionimin e mekanizmave të sigurisë dhe detyrimin e shtetit për të mbrojtur jetën e qytetarëve», deklaron Halilaj, duke shtuar se është shqetësues fakti që kërkohen dorëheqje pa u shqyrtuar më parë veprimet konkrete të institucioneve.

Halilaj thekson se parimi i përgjegjësisë duhet të vlejë për çdo zyrtar, pavarësisht partisë apo postit, dhe se shqyrtimi nuk duhet të kufizohet vetëm te institucionet qendrore. Ai kërkon që të përfshihet në këtë vlerësim edhe Komuna e Pejës bashkë me kryetarin Gazmend Muhaxheri, për të shqyrtuar kompetencat dhe veprimet ose mosveprimet eventuale të tyre. Njëkohësisht, avokati shton se një ministër përgjigjet për detyrat e veta, por nuk mund të mbetet automatikisht fajtor për çdo veprim operacional të strukturave që kanë zinxhirë të veçantë profesionalë dhe ligjorë.