Sulmet ruse në Zaporizhia dhe Odesa lënë tre të vrarë e mbi 50 të plagosur

Të paktën tre persona u vranë dhe më shumë se 50 të tjerë mbetën të plagosur si pasojë e sulmeve ruse të ndodhura të premten në Zaporizhia dhe Odesa, sipas njoftimeve nga autoritetet lokale ukrainase. Forcat ruse goditën qytetin juglindor të Zaporizhias dhe portin strategjik të Odesës në Detin e Zi, duke shkaktuar dëme të konsiderueshme në ndërtesa banimi dhe në një shtëpi private.

Guvernatori rajonal, Mikhail Semikin, njoftoi përmes Telegramit se një shpëtimtar humbi jetën gjatë operacionit të kërkim-shpëtimit, pasi një pllakë betoni u shemb mbi të teksa ekipet po punonin për largimin e rrënojave në kushte të rrezikshme. Semikin shtoi se më shumë se 50 persona u plagosën në këtë qytet, përfshirë gjashtë fëmijë. Ndërkohë, kreu i administratës ushtarake të Odesës, Serhiy Lysak, bëri të ditur se dy persona tjerë u vranë nga një sulm ndaj një shtëpie private, ndërsa pesë persona të tjerë mbetën të plagosur, prej të cilëve dy janë në gjendje të rëndë.