Cili klub firmosi Sule pas largimit nga Dortmundi?

GJERMANI — Niklas Sule nënshkroi kontratë me SV Tiefenbach, klub i Kreisligës, një nga ligat amatore në Baden-Württemberg, vetëm pak ditë pas skadimit të kontratës me Borussia Dortmundin. Edhe pse kishte njoftuar tërheqjen nga futbolli profesionist në maj, mbrojtësi gjerman 30-vjeçar vendosi të vazhdojë karrierën larg skenës së madhe të futbollit.

«Mezi pres që më në fund ta përjetoj futbollin nga një perspektivë krejtësisht e ndryshme, ku bëhet fjalë vetëm për sportin dhe jo për biznesin apo paratë,» tha Sule. Dy nga miqtë e tij më të mirë luajnë te SV Tiefenbach, ndërsa njëri prej tyre është edhe trajner i ekipit.

Mbrojtësi gjerman mbyll kështu një karrierë të pasur si futbollist profesionist, me 49 paraqitje për Kombëtaren e Gjermanisë dhe fanellat e Hoffenheimit, Bayern Munichut e Borussia Dortmundit. Tani, pas 13 vitesh në elitë, ai pret të luajë sërish me miq e ta shijojë gëzimin e thjeshtë të këtij sporti.

Burim: Telegrafi
— Redaksia ZHURMA