Pse krijon Shqipëria një sportel të vetëm për diasporën?
Nisma është pjesë e Strategjisë Kombëtare 2026–2030, që parashikon edhe lehtësi fiskale e regjistër të plotë të diasporës, me kosto 19.3 milionë euro.
TIRANË — Qeveria synon të krijojë një sportel të vetëm (one-stop-shop) për investitorët e diasporës, me qëllim që marrja e informacionit të kryhet në një pikë të vetme. Propozimi është pjesë e Strategjisë Kombëtare për Diasporën 2026–2030, hedhur tani për konsultim publik.
Dokumenti e konsideron diasporën një partner strategjik të shtetit, duke synuar që kontributi i saj të mos kufizohet te remitancat, por të shtrihet edhe në investime, sipërmarrje dhe transferim njohurish. Ministria e Financave, në bashkëpunim me Ministrinë për Evropën dhe Punët e Jashtme, do të hartojë një paketë fiskale të dedikuar për diasporën, me ulje tatimore dhe stimuj sektorialë.
Strategjia parashikon edhe skema grantesh për start-up-et e krijuara nga diaspora, si dhe mbështetje për inkubatorë e akseleratorë biznesi. Ajo evidenton mungesën e një regjistri të plotë të diasporës si pengesë për politika efektive, prandaj parashikon krijimin e Regjistrit të Diasporës dhe databaza për profesionistët, sipërmarrësit e organizatat shqiptare jashtë vendit.
Kostoja e zbatimit të Planit të Veprimit 2026–2028 është rreth 19.3 milionë euro (1.853 miliardë lekë), të cilat do të sigurohen nga buxheti i shtetit, partnerë ndërkombëtarë dhe burime të tjera financimi. Zbatimi i strategjisë do të monitorohet përmes treguesve të performancës dhe raporteve periodike të institucioneve përgjegjëse.
Burim: Shqiptarja
— Redaksia ZHURMA