Spanja sekuestron 21 ton kokainë — rrjeti financohej nga shqiptarët në Dubai
Gjatë operacionit dyvjeçar u arrestuan 43 persona në Spanjë e Ekuador, si dhe u sekuestrua një milion euro kesh në qytetin Arnedo.
MADRID — Autoritetet spanjolle kanë sekuestruar 21 ton kokainë të një organizate kriminale që vepronte në portet e Spanjës dhe Ekuadorit. Operacioni i gjerë ndërkombëtar, i koordinuar me Europol-in, zbuloi se rrjeti financohej nga investitorë shqiptarë me bazë në Dubai, të cilët pastronin paratë përmes kompanive spanjolle.
Ky rrjet i strukturuar përbëhej nga tri degë kryesore. Dega spanjolle, e përbërë nga shtetas spanjollë dhe marokenë, ndërtoi strukturën e biznesit për të importuar kontejnerët nga Amerika e Jugut, duke u dhënë dërgesave një pamje të ligjshme tregtare në porte.
Dega e dytë ndodhej në Ekuador, nga ku kontrolloheshin dërgesat me kokainë që niseshin drejt Spanjës përmes portit të Guayaquil. Dega e tretë në Dubai përbëhej nga investitorët shqiptarë, të cilët financonin kompanitë spanjolle për to kamufluar dërgesat në portet e Malagas, Algeciras dhe Valencias.
Gjatë fazës së parë të hetimit dyvjeçar në mars të vitit 2025 në Ekuador, policia bastisi 50 shtëpi dhe arrestoi 36 persona. Në këtë aksion mori pjesë edhe personeli spanjoll nga UCO, i integruar në forcën policore ekuadoriane.
Në Spanjë, operacioni u shtri në La Rioja, Alicante, Seville dhe Cadiz, ku u arrestuan tetë persona. Gjatë bastisjeve në qytetin Arnedo, policia sekuestroi rreth një milion euro kesh dhe ngriu prona, automjete e asete financiare që dyshohet se u krijuan nga ky rrjet.
Burim: Shekulli
— Redaksia ZHURMA