Pse kërkon Smakiqi shtyrje të konkursit për Kryeprokuror të Shtetit?
Avokati Xhevdet Smakiqi kërkon shtyrje të konkursit për Kryeprokuror të Shtetit derisa Këshilli i ri të provojë pavarësinë nga politika.
PRISHTINË — Avokati Xhevdet Smakiqi ka kërkuar shtyrjen e konkursit për Kryeprokuror të Shtetit, duke argumentuar se një Këshill Prokurorial me integritet dhe pavarësi "nuk e ka shefe Presidenten e Kosovës".
Në emisionin "Tempus" në T7, Smakiqi tha se presidentja ka vetëm një kompetencë formale për të aprovuar rekomandimet e Këshillit, qoftë për kryeprokurorin apo prokurorë të tjerë, dhe se kjo nuk është e lejuar me Kushtetutë.
Smakiqi fajësoi drejtpërdrejt kryeministrin Albin Kurti dhe presidenten Vjosa Osmani për ndërhyrje politike, duke thënë se ata "në mënyrë të paprecedentë" nuk e dekretuan rekomandimin e ish-Këshillit Prokurorial për Blerim Isufajn, i cili kishte fituar në konkurs.
"Kur kemi një ndërhyrje politike direkte nga një Kryeministër dhe Qeveri që i etiketon prokurorët, atëherë në këtë fazë duhet të shtyhet dhe të mos shpallet konkursi", tha ai, duke kërkuar që Këshilli i ri të tregojë fillimisht se nuk ka ndikime politike.
Burim: Gazeta Express
— Redaksia ZHURMA