Si e rrezikojnë pagat ekzekutimi i 1 milion eurove në RTK?

PRISHTINË — Shoqata Sindikale e Radio Kosovës dhe Sindikata e Pavarur e RTK-së kanë shprehur shqetësim për gjendjen financiare të transmetuesit publik, pas ekzekutimit të mbi 1 milion eurove nga përmbaruesi për çështjen e emisionit “Milioneri”.

Sipas reagimit të tyre, ky zhvillim e ka futur RTK-në në një situatë alarmante, duke rrezikuar funksionimin normal të institucionit dhe pagat e qindra punëtorëve. Sindikatat kanë theksuar se RTK-ja tashmë përballet me mungesë të buxhetit për përmbushjen e obligimeve bazë ndaj programit dhe stafit, ndërsa kjo goditje financiare vetëm sa e thellon krizën ekzistuese.

“Në një kohë kur RTK-ja tashmë përballet me një buxhet të pamjaftueshëm për të përmbushur obligimet bazë ndaj programit dhe stafit, kjo goditje financiare e thellon edhe më shumë krizën dhe krijon pasiguri të madhe tek punëtorët”, thuhet në reagim.

Sindikatat i kanë bërë thirrje Bordit të RTK-së që urgjentisht të ndërmarrë të gjitha veprimet institucionale dhe ligjore për të garantuar stabilitetin financiar të mediumit publik. Ata kanë kërkuar gjithashtu transparencë të plotë nga menaxhmenti dhe Bordi lidhur me hapat që do të ndërmerren për tejkalimin e situatës. “Punëtorët e RTK-së nuk duhet të paguajnë çmimin e vendimeve të gabuara menaxheriale apo të problemeve të trashëguara institucionale”, thuhet më tej.

Burim: Koha.net
— Redaksia ZHURMA