Si u shitën në tregun shqiptar 1.1 tonë bajame toksike?

TIRANË — Më shumë se 1.1 tonë bajame toksike, me etiketimin "BLANCHED ALMOND EXTRA FINE" dhe të importuara nga Spanja, janë shitur në tregun shqiptar. Alarmin e ka dhënë Autoriteti Kombëtar i Ushqimit (AKU), pas analizave që kanë konstatuar praninë e acidit hidrocianik mbi nivelin e lejuar, substancë toksike me rrezik për shëndetin e konsumatorëve.

Produkti ka datë skadence më 22 tetor 2026 dhe është importuar në Shqipëri nga subjektet Albania Smart Distribution SHPK dhe Alta Group. Sipas AKU-së, nga 1.100 kilogramë bajame të importuara nga Albania Smart Distribution dhe një subjekt tjetër, e gjithë sasia rezulton të jetë shitur te konsumatori fundor.

Ndërkohë, nga 100 kilogramë të importuara nga Alta Group, 42 kilogramë janë bllokuar dhe do të asgjësohen, ndërsa 58 kilogramë rezultojnë të jenë shitur. Autoriteti u bën thirrje qytetarëve që e kanë blerë këtë produkt ta kthejnë në pikën ku e kanë blerë, pa e konsumuar.

Autoriteti Kombëtar i Ushqimit u njoftua për rastin përmes sistemit evropian të alarmit për sigurinë ushqimore.

Sipas AKU-së, konsumatorët duhet të kontrollojnë çdo produkt bajamesh të blerë dhe të verifikojnë nëse përputhet me lotin e njoftuar. Nëse përputhet, duhet ta shmangin konsumimin.

*Burim: Gazeta Si, https://gazetasi.al/skandal-shiten-ne-treg-rreth-1-1-tone-bajame-toksike-aku-mos-i-konsumoni/*
*— Redaksia ZHURMA*