Pse AKU paralajmëron për rrezik nga bajamet e importuara nga Spanja?
Mbi 1100 kilogramë produkt të kontaminuara me acid hidrocianik kanë hyrë në treg; konsumatorët thirren të kthejnë produktin.
— Autoriteti Kombëtar i Ushqimit (AKU) ka identifikuar bajame të kontaminuara me acid hidrocianik, një lëndë që përbën rrezik serioz për shëndetin e njeriut. Produkti i identifikuar mban emrin “BLANCHED ALMOND EXTRA FINE” dhe ka hyrë në Shqipëri nga Spanja përmes operatorit eksportues Dryfo Menexopoulos Bros SA.
Sipas të dhënave të AKU, rreth 1100 kilogramë të këtij produkti, të importuara nga subjektet “Albanian Smart Distribution” dhe “N.N”, janë shitur tashmë plotësisht tek konsumatori fundor. Ky njoftim vjen pas një alerte të sistemit RASFF (Rapid Alert Sistem for Food and Feed), ku Shqipëria është etiketuar për ndjekje të ngushtë të kësaj ngjarjeje.
Një subjekt i tretë, “ALTA GROUP”, kishte importuar 100 kilogramë, nga të cilat 58 kg janë shitur, ndërsa 42 kg të mbetura janë bllokuar dhe do të asgjësohen. Produkti i kontaminuar mbart kodin LOT: LO12200001 dhe ka një datë skadence deri më 22 tetor 2026, gjë që e bën të rëndësishme verifikimin e etiketave në shtëpi.
Institucioni i kërkon të gjithë konsumatorëve që kanë blerë këtë produkt ta kthejnë menjëherë pranë pikave ku është kryer blerja. Prania e acidit hidrocianik mbi vlerën e lejuar kërkon masa të shpejta për të parandaluar ndërhyrjet negative në shëndetin publik.
Burim: Shqiptarja
— Redaksia ZHURMA