Si u mirëprit Baleti Kombëtar në Romë?
Shfaqja "Carmina Burana" në Teatro Grande mblodhi përfaqësues të institucioneve kulturore italiane dhe personalitete të jetës kulturore.
ROMA — Baleti Kombëtar i Kosovës prezantoi "Carmina Burana" në Teatro Grande të Accademia Nazionale di Danza di Roma, në kuadër të turneut të tij në Itali. Shfaqja, e realizuar me koreografi nga Toni Candeloro, mblodhi përfaqësues të institucioneve kulturore italiane, artistë dhe personalitete të jetës kulturore.
Zëvendësministrja e Kulturës, Nora Arapi Krasniqi, dhe ambasadorja e Republikës së Kosovës në Itali, Nita Shala, e hapën mbrëmjen me fjalë përshëndetëse. Të dyja vlerësuan rëndësinë e prezantimit të kulturës kosovare në skenat ndërkombëtare dhe rolin e artit në forcimin e marrëdhënieve kulturore mes Kosovës dhe Italisë.
Përmes kësaj shfaqjeje, Baleti Kombëtar i Kosovës po vazhdon promovimin e krijimtarisë artistike vendore dhe prezantimin e potencialit të artistëve kosovarë para publikut ndërkombëtar. Turneu në Itali vijon me performancën e radhës, ku "Carmina Burana" do të prezantohet në skenën e Ex Convento dei Teatini në Lecce, duke sjellë mundësinë për publikun italian që të njohë punën dhe arritjet e Baletit Kombëtar të Kosovës.
Burim: Ekonomia Online
— Redaksia ZHURMA
