Si do të caktohet qeveria teknike sipas protestuesve në Tiranë?

TIRANË — Organizatorët e protestës kundër qeverisë së Edi Ramës, e cila vazhdon prej gati një muaji, kanë paraqitur një plan për krijimin e një qeverie teknike dhe ndryshime kushtetuese, të cilat do të drejtohen nga një asamble qytetare. Ilir Xhemalaj, një prej firmëtarëve të letrës së dërguar ambasadave, shpjegoi në Report TV se pas dorëheqjes së kryeministrit Rama, do të formohet një asamble prej 300-400 anëtarësh, e cila do të caktojë përbërjen e qeverisë së re dhe do të përgatisë ndryshimin e Kushtetutës.

Xhemalaj theksoi se kushti i parë dhe i panegociueshëm mbetet dorëheqja e Ramës, ndërsa qeveria teknike duhet të zgjasë 12 muaj. Ai nuk përjashtoi mundësinë e shpërndarjes së Parlamentit pas miratimit të qeverisë teknike, por nuk sqaroi se si do të realizohen ndryshimet kushtetuese, duke qenë se Kushtetuta aktuale kërkon votën e 2/3 të deputetëve për amendamente.

Sipas Xhemalajt, parlamenti aktual duhet të dëgjojë thirrjet e protestuesve në shesh para se të miratojë qeverinë teknike. "Kuvendi paraqet vullnetin e popullit, dhe populli ka dalë në shesh me kërkesa të qarta," tha ai. Pas miratimit të qeverisë teknike, një grup intelektualësh do të vendosë nëse parlamenti do të mbetet apo do të shpërndahet.

Për anëtarët e asamblesë qytetare dhe qeverisë teknike, Xhemalaj vendosi dy kushte kryesore: të jenë të papërlyer, pa lidhje me korrupsionin ose tenderat shtetërore, dhe të mos kenë pasur role drejtuese në shtetin shqiptar gjatë viteve të fundit. Kjo ide ngjan me propozimin e Dritan Goxhajt për zgjedhjen e anëtarëve të asamblesë me short, megjithëse organizatorët mohojnë mundësinë e krijimit të një partie të re politike.

Protestuesit kanë paraqitur një listë kërkesash që synojnë zhbërjen e sistemit aktual dhe riformimin e klasës politike. Kërkesat përfshijnë dorëheqjen e Ramës, krijimin e një qeverie teknike dhe ndryshime kushtetuese, të cilat do të përgatiten nga asambleja qytetare. Megjithatë, mënyra se si do të zgjidhet kjo asamble mbetet e paqartë.

Burim: Shqiptarja
— Redaksia ZHURMA