Shtyhet ekskursioni i maturantëve të Drenasit në Shqipëri

Kryetari i Komunës së Drenasit, Ramiz Lladrovci, ka vendosur dhe rekomanduar që të shtyhet ekskursioni i maturantëve të Gjimnazit “Gjergj Kastrioti Skënderbeu” në Shqipëri për një kohë më të përshtatshme brenda këtij viti shkollor, për shkak të situatës së tensionuar dhe protestave të studentëve atje.

Vendimi dhe kërkesa e kreut të komunës erdhën pasi në Shqipëri është krijuar një situatë e tendosur e përcjellë me protesta studentore dhe dhunë të ushtruar. Po ashtu, prindërit e nxënësve kishin shprehur shqetësimet dhe brengat e tyre lidhur me sigurinë e maturantëve gjatë këtij udhëtimi.

Sipas njoftimit nga Komuna e Drenasit, vlerësohet se jeta dhe siguria e të rinjve janë mbi çdo aktivitet tjetër, ndërsa ekziston mundësia e provokimeve dhe e incidenteve të padëshiruara. Zyrtarët komunalë nëglizojnë se mbeten të përkushtuar që kjo vizitë shkollore të realizohet në kushte plotësisht të sigurta.

Kryetari Lladrovci ka deklaruar se prania e maturantëve mund të provokohet lehtësisht me atdhetarizmin si traditë, duke rrezikuar të bëhen pjesë e lajmeve të padëshirueshme. Ai ka theksuar se si prind është në një mendje me prindërit e tjerë për shtyrjen e udhëtimit derisa siguria të jetë e padiskutueshme.

Komuna synon që ekskursioni të realizohet brenda këtij viti shkollor sapo të krijohen rrethanat e duhura. Në këtë mënyrë, udhëtimi planifikohet të mbetet një kujtim i bukur dhe kulmi i shoqërimit për këtë gjeneratë nxënësish.

«Rekomandimi im është të shtyhet ekskursioni për një kohë të përshtatshme, brenda këtij viti shkollor, kur siguria Juaj është e padiskutueshme dhe pa rreziqe. Ekskursioni shënon gëzimin e përbashkët të gjeneratës që vulos ndjenjat e secilit maturant dhe do të mbetet në kujtesë si kulmi i një shoqërimi të moshës më të çmuar.»

«Prania Juaj, me atdhetarizmin si traditë, fare lehtë mund të provokoheni dhe të bëheni pjesë e lajmeve të padëshirueshme. Në këtë rast, jeta dhe siguria Juaj për mua është më e rëndësishme se çdo gjë tjetër në botë. Si prind, ashtu si prindërit Tuaj të cilët kanë shprehur brengë për sigurinë Tuaj, jemi të bindur dhe të pajtimit që ekskursioni të shtyhet për kohë të përshtatshme. E di se energjia juaj si maturantë është mbresëlënëse, atdhedashuria dhe mosha juaj nuk guxon të provokohet apo të rrezikohet nga situatat që mund të ndodhin gjatë ekskursionit.»