Mjekët shqiptarë në Gjermani peticion Bundestagut për protestat në Shqipëri

Një grup mjekësh dhe profesionistësh shëndetësorë shqiptarë që punojnë në Gjermani i kanë dërguar një peticion Bundestagut gjerman dhe eurodeputetëve, ku kërkojnë hetim të pavarur për përdorimin joproporcional të forcës nga policia gjatë protestave që po zhvillohen prej më shumë se katër muajsh në Tiranë dhe qytete të tjera.

Organizata të të drejtave të njeriut kanë raportuar për hedhje gazi lotsjellës pa paralajmërim ndaj protestuesve, ndërsa edhe Delegacioni i BE-së në Tiranë ka kërkuar një hetim të shpejtë për këto pretendime. Profesionistët shëndetësorë theksojnë se gazi lotsjellës shkakton dëmtime të rënda te fëmijët, të moshuarit dhe personat me sëmundje kronike, ndaj bëjnë thirrje për mbrojtjen e të drejtës së protestës paqësore.

Sipas tekstit të peticionit, shqetësim i veçantë mbetet raportimi për përdorimin e automjeteve që perceptohen si ambulanca në mbështetje të veprimeve policore. Mjekët deklarojnë se automjetet mjekësore dhe personeli shëndetësor duhet të shërbejnë vetëm për kujdesin ndaj të lënduarve dhe kurrë për operacione të policisë. Ata kërkojnë po ashtu mbrojtje për gazetarët dhe stafin mjekësor, si dhe garanci për kujdes të paanshëm shëndetësor.

Në kërkesat e tyre drejtuar parlamentarëve gjermanë, nënshkruesit kërkojnë që kjo situatë të përfshihet në axhendën e anëtarësimit të Shqipërisë në Bashkimin Evropian, specifikisht te kapitujt për shtetin e së drejtës dhe të drejtat themelore. Ata i bëjnë thirrje diplomatëve të përdorin të gjitha mjetet në dispozicion për të parandaluar përshkallëzimin e mëtejshëm të ngjarjeve në Shqipëri.

«Si mjekë, e dimë se çfarë dëmtimesh shkakton gazi lotsjellës, sidomos te fëmijët, të moshuarit dhe të sëmurët kronikë. Ambulancat dhe personeli mjekësor duhet të shërbejnë vetëm për kujdesin ndaj të lënduarve, kurrë si pjesë e operacioneve policore», thuhet në reagimin e mjekëve shqiptarë në Gjermani.