SHSKUK paralajmëron masa ndaj Gëzim Berishës pas arrestimit për dhunë

Shërbimi Spitalor Klinik dhe Universitar i Kosovës ka bërë të ditur se ka autorizuar menjëherë Zyrën Ligjore për t'u drejtuar te organet kompetente rreth arrestimit të drejtorit të Spitalit të Mitrovicës, Gëzim Berisha, i cili dyshohet për dhunë në familje. Prokuroria Themelore në Prishtinë dhe Policia e Kosovës konfirmuan ndalimin prej 48 orësh për drejtorin, ndërsa Enis Pllana nga policia njoftoi se viktima deklaroi se nuk bashkëjeton me të prej disa muajsh. «Për SHSKUK-në, këto raportime janë jashtëzakonisht shqetësuese. Qëndrimi ynë institucional është i prerë, dhuna në çfarëdo forme është e dënueshme dhe nuk tolerohet në asnjë rrethanë. Në bazë të informacioneve zyrtare që do të pranohen nga organet kompetente, SHSKUK do të ndërmarrë masat më të rrepta administrative dhe ligjore ndaj drejtorit në fjalë», u shpreh institucioni shëndetësor.

Viktima ka raportuar në polici për dhunë psikike të vazhdueshme, ndërsa sipas raportimeve të mediave, Berisha dyshohet se e ka kërcënuar bashkëshorten se do t'i ndodhë e njëjta fatkeqësi si Arlinda Zekajt.

Siç raportoi Zhurma më 31.10.2026, drejtori i Spitalit të Përgjithshëm të Mitrovicës ishte vënë në pranga nën dyshimet për dhunë në familje dhe kërcënime ndaj bashkëshortes së tij.