Si jetoi shqiptari 11 vjet ilegalisht në Gjermani me dokument grek të falsifikuar?
Policia Federale e Rosenheimit e zbuloi 46-vjeçarin në trenin nga Verona, pas refuzimit të azilit në 2015.
ROSENHEIM — Policia Federale gjermane ka arrestuar një 46-vjeçar shqiptar gjatë një kontrolli kufitar në Rosenheim, pasi ai jetoi ilegalisht në Gjermani për rreth 11 vjet pa u zbuluar.
Burri ishte fshehur që nga viti 2015 në rajonin e Bavarisë së Epërme, duke përdorur një dokument identifikimi grek të falsifikuar, me të cilin kishte punuar dhe kishte mashtruar autoritetet, bankat dhe një kompani sigurimi shëndetësor, sipas njoftimit të Policisë Federale të Rosenheimit.
Ai u vu re në një tren të linjave të gjata që vinte nga Verona dhe fillimisht paraqiti një kartë identiteti greke, e cila u konstatua si falsifikim i plotë. Pas verifikimit të gjurmëve të gishtërinjve, u zbulua identiteti i vërtetë i tij si shtetas shqiptar.
Dokumentin e falsifikuar e kishte siguruar në 2015, pasi kërkesa e tij për azil ishte refuzuar përfundimisht. Ndaj tij po hetohet për tentativë hyrjeje të paligjshme, qëndrim të paligjshëm dhe falsifikim dokumentesh. Autoritetet kanë vendosur ndalim hyrjeje dhe qëndrimi për katër vjet; dëbimi pritet së shpejti. Ai ka depozituar 1.000 euro për biletën e fluturimit drejt Shqipërisë.
Burim: Telegrafi
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.