Qendra e Librit shpall tre fituesit e fondit për fëmijë
Teuta Toska, Xhahid Bushati dhe Adelina Mamaqi u përzgjodhën nga juria mes 16 dorëshkrimeve të paraqitura në këtë edicion.
TIRANË — Qendra Kombëtare e Librit dhe Leximit ka shpallur tre fituesit e edicionit të sivjetmë të Fondit të Krijimtarisë Letrare për Fëmijë. Ky projekt synon mbështetjen e autorëve shqiptarë dhe pasurimin e letërsisë për lexuesit e vegjël, duke nxitur krijime të reja me cilësi të lartë artistike.
Drejtoresha Arta Marku vlerësoi rëndësinë e këtij fondi si një mundësi të çmuar për zhvillimin e krijimtarisë. Sipas saj, përkrahja e tillë është thelbësore për afrimin e fëmijëve me librin, duke krijuar ura të reja komunikimi mes autorëve shqiptarë dhe brezave të rinj të lexuesve.
Juria e përbërë nga Flori Kasaj, Rovena Rrozhani dhe Rudina Çupi përzgjodhi pesë finalistë nga gjashtëmbëdhjetë dorëshkrimet që kaluan fazën e shqyrtimit. Në përfundim të procesit, fitues u shpallën Teuta Toska me “Na quajnë Motrat Qiriazi”, Xhahid Bushati me “Plaku me akullore” dhe Adelina Mamaqi me “Tregimet e Kalendarit”.
Finalistët e tjerë të këtij edicioni ishin autorët Aldo Mustafa dhe Fatmir Gjestila. Përzgjedhja e fituesve vjen si pjesë e politikave për të mbështetur krijuesit që u kushtohen botimeve për fëmijë, duke nxitur kureshtjen dhe imagjinatën e tyre përmes poezisë, përrallave e tregimeve.
Burim: Gazeta Tema
— Redaksia ZHURMA
