Si u përplas shoferi i dehur me policinë në Durrës?
Rezart Abazaj, 44-vjeçar me 1.4 mg/l alkool, arrestohet në flagrancë pasi goditi makinën e policisë duke u përpjekur të ikë.
DURRËS — Një 44-vjeçar në gjendje të dehur ka përplasur automjetin e policisë në Durrës gjatë një ndjekjeje, në të njëjtën zonë ku ditë më parë humbën jetën dy fëmijë. Patrulla kishte nisur ndjekjen pasi u njoftua për një shofer që lëvizte me shpejtësi të pakontrolluar në rrugët e lagjes 17, zonës së ish-Kënetës.
Shoferi, i identifikuar si Rezart Abazaj, u përpoq të ikë dhe duke ecur mbrapsht goditi makinën e policisë. Ngjarja ndodhi vetëm një rrugicë larg vendit të tragjedisë së fundit që i mori jetën dy fëmijëve dhe plagosi një tjetër.
Testi i alkoolit tregoi 1.4 mg/l, dyfishin e sasisë së Nikoll Radaçit, shoferit që shkaktoi vdekjen e fëmijëve. Abazaj rezulton përsëritës: ai ishte arrestuar më 5 mars të këtij viti gjithashtu në gjendje të dehur, por gjykata i kishte caktuar vetëm detyrim paraqitjeje, duke e kthyer në rrugë.
Prokuroria po kryen veprimet procedurale ndaj tij pas arrestimit në flagrancë.
Burim: Zëri
— Redaksia ZHURMA