Dhjetë vjet nga stuhia katastrofike në Shkup — 22 të vdekur nga vërshimet
Më 6 gusht 2016, rajoni u godit nga reshjet rekord prej 93 litrash për metër katror, duke shkaktuar dëme të mëdha dhe evakuimin e 1.000 qytetarëve.
SHKUP — Dhjetë vjet më parë, më 6 gusht 2016, rajoni i Shkupit u godit nga një stuhi e fuqishme dhe vërshime katastrofike që u morën jetën 22 personave. Sot përkujtohen përmbytjet katastrofike në Shkup, 10 vjet më pas, të cilat lanë pasoja të rënda dhe të përhershme për mijëra banorë të zonës.
Stuhia nisi fillimisht në rajonin e Pollogut dhe u zhvendos me shpejtësi drejt kryeqytetit, ku brenda 24 orëve ranë 93 litra shi për metër katror. Gjatë dy orëve të para të stuhisë u regjistruan mbi 800 vetëtima, ndërsa zonat më të dëmtuara ishin fshatrat verilindorë si Hasanbeg, Stajkovc, Smillkovc, Creshovë dhe Haraçinë.
Shumica e viktimave të kësaj tragjedie ishin të moshuar, të sëmurë dhe të pafuqishëm, ndërsa mes tyre humbi jetën edhe një fëmijë dyvjeçar. Përveç viktimave në njerëz, më shumë se 1.000 qytetarë u evakuuan gjatë asaj nate kritike, ndërsa dhjetëra të tjerë u pranuan me lëndime të ndryshme në klinikat e qytetit.
Pas tragjedisë, qeveria shpalli gjendje krize për 15 ditë në rajonet e prekura të Shkupit dhe Tetovës, ndërsa vendi shpalli ditë zie. Organizimi i shpejtë i qytetarëve përmes rrjeteve sociale ndihmoi në shpërndarjen e ndihmave për familjet që mbetën pa shtëpi e strehë.
Burim: Almakos
— Redaksia ZHURMA